عباس جيجان الشاعر البصري يتغني بحبك يا عراق

من طرف lione1972 الأربعاء مايو 14, 2008 8:16 am

منته وحيد . . .
انت الشعب كله بشيعية وسنتة
منهو الكالك ناسيك ؟؟
هم ينسى الكمر وكته ! ؟
لو نبض الكلب يتنكر بدكته!
بس عشقك عشق مفضوح
وعشق الناس كلهه مساتر وسكتة
صرت انت سبت وبركبة يهودي
هم شايف يهودي يجوز من سبتة!

انت الفارس اليسبك هبوب الريح
وماضن خيل سابكته
وانتة اليرهم ترابك كحل
للعين ودوة للما شفت علتة
ومن طينك نحني جفوف المعرسين
كل اصبع فرح من طينتك طكته
وانته الريحة ترابك ترد الروح
هيل وزعفران وعنبر بشمته
ومثل تراب كاعك ما لكينة تراب
يرهم للصلاة من طينتة تربتة

انت ينام بيك المرتضى الكرار
ابو الحسنين التلوذ الناس كلهه بشارتة وبختة
وانت ينام بيك بكربلاء حسين
الما بايع الطاغي ودنك ركبتة
وانت البيك ضلت شارة العباس
لمن طاح دنكلة الفرات وباسة من شفتة

من طلعت منك يوم طرني البين
كلبي وياي ما جبتة
اثاريني نسيتة هناك
عندك قلبي امنتة
شتلتة بجرف دجلة الخير
وي سباح الشواطي شربكت بتة
ومتدن عروكة بوسط ذيج الكاع
وبماي الفرات ودجلة عمدتة
ولمن صار ينقل جدمة بين الناس
اخذتة وياي للكاظم على الشباك زورتة

صح هسه اصبحت من وطن نيدرلاند
هولندي الهوية وشعري جللته
وصح اتأقلمت وية الغرب فد نوب
وصرت ماصخ مثلهم والملح عفتة
وصح كمت ارطن رطنهم لمن يرطنون
ولسان العرب بالأعجمي كسرتة
لكن
لكن
مدري شنهو يصير بي لمن يمر طاريك
احسنك دفو تموز وسط اشتة
واثاريني مثل طبع النخل لو طال
يرجع للأصول وتنحني شعفتة
العالم نسى يوم 11 من ايلول صارت بيك سالفتة
ناس دكول لازم نحتوي ونشفط البترول
ونعوض الراح ونسرك بركتة
وناس دكول لازم هالحصار يدوم
وناس دكول لازم ننزع اسلحتة
وناس دكول خطية اطفالة ماتو من الجوع
وناس دكول حيل ويا
ماحمد ربه وشاكر انعمتة
وانت بين هذا وذاك صاير شبح لليرمون
وياهو الكام ضدك سددت اتفكتة

جي لنك حلو والدول منك تغار
ماعدهم العندك من مجد نلتة
انت اول وطن آدم وضع جدمة عليه وكال ياالله لأنك وصلة من جنتة
وانت اول وطن حبة النبي ابراهيم ودعة ربة يصونة برحمتة وعزتة
وانت اول وطن مرسى لسفينة نوح ونبي ايوب ناخت بيك راحلتة
وانت اول وطن علم العالم ابجدية ويكتب التاريخ
وانت اول وطن قانون سننتة
وانت اول وطن كالتلة الشمس يمة صباح الخير
ولو رادت تمسي تمسي يم كبتة
وانت اول وطن ما تشبه الأوطان
مدري شلون ربك خالقك سبحان ربي شلون صورتة
صورتة العراق وبس علينة يلوك
واحنة نلوكلة لمن يحل وكتة